雖然話"不想長大",但事實上點唔想都係要長大...
仍然留响呢一行,說穿左都仲表示自己係一個理想主義者,想做自己喜歡 的事. 真心想搵錢的,走去做返sales好過啦,又唔係未做過!(一個月賺到兩三皮咁又點,但係做得唔開心,同事面口假到爆,句句: 冰姐,教下我點做丫咁....諗起都想作噁!!! 雖然去到邊都會見到呢d人,不過比率始終低好多!!)
看到同期出身的朋友好多都有事業基礎,搵到一定的收入... 有時諗, 幾廿歲人活到呢一刻都仲係一事無成,仲要由頭學起,真係有d過份! 但係我唔怕醜唔怕瘀唔怕碰釘, 我有我的目標,雖然起步遲,不過總會有達到的一天,別人不明白也沒辦法, 我知道自己想要咩就夠了!

上兩星期無意中經過金魚街,見到有隻迷你品種的龜仔很可愛,超細粒的,我自以為是叫佢做"粒粒龜"... 我個人就係咁,鍾意果樣野就會掛住,結果諗左成個禮拜,到尋日最終都係忍唔住買左兩隻粒粒龜返屋企 (心水清的朋友可能會問...咦?咁之前d小雞泡呢?..... 係... 你估中左啦,佢地已經...... !!! 信我啦,今次粒粒龜的下場唔會一樣架啦....雖然我都曾經試過養死龜....啋!啋!大吉利是!)

諗返起初中時期曾經做過一樣好殘忍的事....果時媽咪要返工,我放左學就自己,或者同家姐响屋企做家務.有一次放學响街見到有擋舖頭賣魚魚,又係忽然好想養,於是買左兩條唔記得咩品種的魚仔,返到去先後悔,驚媽咪鬧(媽咪好惡...), 死啦!點算?! 望住個鐘在倒數,媽咪就夠鐘返黎,唔知點搞d魚仔好,驚起上黎,突然間諗到不如倒入廁所沖走去,點知.... 倒左落廁所之後,發覺佢地仲响度游得好開心咁... 沖唔落手... (果時先知原來我屋企廁所用淡水)... 死! 開門聲..媽咪返....sh...........!!!!
呢件事到依家諗返起都覺得好內疚,就咁整死兩條生命.....

暫時未影到粒粒龜的相,遲d先畀你地睇下佢地有幾得意...